كيف يمكّنك الصندوق الثقافي في قطاع الأزياء؟

كيف يمكّنك الصندوق الثقافي في قطاع الأزياء؟

الصندوق الثقافي هو جهة حكومية تأسست عشان تنمّي القطاع الثقافي، وتخلق للمبدعين وروّاد الأعمال فرص متنوعة يقدرون من خلالها يطورون إبداعهم، ويحولونه لمشاريع متكاملة ينافسون بها ويطلعون فيها للعالم. وبعد الدعم والتمكين، يصبح قطاع مهيأ وجاذب للاستثمارات المحلية والعالمية؛ لتمكين ونمو أكبر ويحقق أهداف رؤية المملكة

كيف يدعم الصندوق القطاعات الثقافية؟

إذا أنت رائد أعمال أو عندك منشأة ثقافية، يقدم الصندوق لك خدمات مالية تساعدك تتوسّع بمشروعك أو تبدأ واحد جديد. أما إذا كنت مبدع، فالصندوق يقدم لك خدمات تطويرية تساعدك تطوّر قدراتك وتصير مستعد تفتح مشروعك، وهي مصممة لكل المستفيدين حتى رواد الأعمال والمنشآت، ويُنصح على الأغلب البدء بالاستفادة من الخدمات التطويرية لبناء أساس قوي للأعمال، ومن أشكال هذه الخدمات

الاستشارات المجانية

الصندوق يقدم خدمة استشارات يمكنك طلبها مباشرة من موقعهم الرسمي، وهالخدمة مهمة جدا؛ لأنها تتيح لك استشارة خبراء متخصصين في مجال الأعمال، يساعدونك على ترتيب وتنظيم أفكارك، سواء كنت حاب تبدأ مشروع جديد أو عندك مشروع قائم وتبي تطوره

القسائم المجانية

يقدم الصندوق اليوم 4 قسائم مجانية تساعد المشاريع الثقافية تبدأ بأساس قوي وتخطيط سليم، وتخفف عليهم العبء المالي، ومن هذه القسائم

الموقع الإلكتروني: تصمم موقع يستعرض خدماتك وإبداعك، يدعم اللغتين العربية والإنجليزية، وتشمل القسيمة تدريب على استخدام لوحة التحكم

تدقيق القوائم المالية: تغطي تكاليف الحصول على قوائم مالية معتمدة وتساعدك على تنظيم الجانب المالي

الدعم القانوني: تساعد على تقديم الخدمات القانونية وفهم الأنظمة المتعلقة بالمشاريع الثقافية

مساحة العمل: توفر لك مكاتب في مساحات عمل مشتركة، وتقلل لك من تكاليف التشغيل، وتوفر بيئة عمل مناسبة، وهذه المساحات في الرياض وجدة والدمام

وهنا رابط خدمة القسائم 

وبعد ما عرفنا وش الخدمات التطويرية، صار الدور نعرف الخدمات المالية، وأهمها التمويل الثقافي اللي تم الإعلان عنه مؤخرًا

التمويل الثقافي

تخيل أن هذا التمويل هو التمويل الأول من نوعه في المملكة، يقدمه الصندوق بالشراكة مع عدة بنوك مهمة، والي يميز هذا التمويل هو الحلول المرنة مثل فترات سداد طويلة باستقطاع شهري، بالإضافة لنسب فوائد تنافسية، وتختلف من مشروع لمشروع حسب حجم المنشأة. ويميزه كذلك دعمه لجميع القطاعات الثقافية

وأول مبادرة من مبادرات هذا التمويل في قطاع الأزياء كانت تمويل 4 شركات رائدة في قطاع الأزياء بقيمة تتجاوز 30 مليون ريال سعودي لأربع شركات سعودية وهي

1886

فيمي ناين

السعودية جواهر

بلومينق 

طيب لو عندي براند كيف ممكن يفيدني التمويل؟

التمويل من الصندوق الثقافي يقدر يكون نقطة تحول لعلامتك التجارية، ويساعدك تسرع نموك بشكل كبير

تخيل أنك تبي تنتج كميات كبيرة من منتجاتك، لكن المصنع يطلب منك عدد معين ما تقدر تدفعه حالياً، هنا يجي دور التمويل ويساعدك تغطي هالتكاليف، أو يمكن عندك مجموعة منتجة من قبل، بس تحتاج دفعة قوية للتسويق عشان توصل لعملاء أكثر. التمويل بعد يقدر يساعدك توزع منتجاتك على موزعين جدد، وتوسع نطاق وصولك. ما ننسى بعد أن التمويل ممكن يساعدك تطور فريق عملك، سواء بالتدريب أو بتوظيف كفاءات جديدة تضيف لعلامتك التجارية. كل هالأمور تقدر تسويها بفضل التمويل، وهذا راح يخلي علامتك التجارية تنمو وتتطور بسرعة أكبر

لكن هل التمويل للعلامات التجارية بالأزياء فقط؟

لا، الصندوق الثقافي يدعم أنشطة سلسلة القيمة لقطاع الأزياء والقطاعات الثقافية الـ16، وش يعني سلسلة القيمة؟ يعني كل المراحل اللي يمر فيها المنتج قبل يصير منتج نهائي، فهو يشمل كل مشاريع الأزياء الي تقدم خدمات أو منتجات مساندة، مثل المشاريع الي تدعم التعليم والتصميم والإنتاج مثل المصانع الصغيرة والتحول الرقمي والتسويق والإدارة وتطوير تجربة العملاء أو شركات تحتاج مساعدة مالية في إطلاق مبادرات تدعم استدامة الأزياء والمسؤولية الاجتماعية

قدمت وانرفض طلبي، وش الحل؟

يهتم الصندوق اهتمام كبير بأن المشاريع اللي يدعمها يكون لها أساس صحيح وخطة مدروسة تمكّنها تنمو وتتطور وتنافس محليًا وعالميًا، وتحقق أهداف التمويل، عشان كذا الطلبات اللي ما تكون مطابقة للمعايير والشروط يوضح لها الصندوق نقاط الضعف، ويكون دورك بعدها العمل عليها وتقويتها، وتذكر فيه خدمات تطويرية ذكرناها ممكن تساعدك

وش الهدف من هذا كله؟ وش العائد المتوقع؟

الصندوق له رؤية طموحة وهي ترسيخ ريادة مملكتنا في مجال الثقافة عالميًا

كيف؟ عن طريق إنه يمكّنك أنت من أنك تبدأ مشروعك وتتوسّع فيه وتحقق أهدافك ليصبح وجهة عالمية ثقافية تعرّف العالم بتنوع ثقافتنا. وبتنمية القطاع الثقافي وتنويع فرصه، تتزايد الإبداعات وتزيد الفرص الوظيفية للسعوديين والسعوديات ومعها قيمة ثقافتنا. أحد أهداف الصندوق أيضًا هي جذب الاستثمار في القطاع الثقافي، اللي قطاعاته ما كانت جذابة للمستثمرين قبل، لأن أصحاب المشاريع الإبداعية المعظم منهم ما عندهم التفرغ الكامل أو الخبرة الكافية للمهارات الإدارية والمالية، وهذا يخوف المستثمرين يستثمرون معك، وعشان كذا الصندوق يساعد المشاريع الثقافية بالتطوير والدعم المالي، وتكون القطاعات الثقافية مستقبلا أكثر جاذبية للاستثمارات، وبكذا تزيد مساهمتها في اقتصاد المملكة، مثلا قطاع الأزياء خلال سنوات قليلة ارتفعت نسبة مساهمته في الناتج المحلي في عام 2023 بـ 2.5% مقارنة بنسبة 1.4% في عام 2022-2021، والهدف تزيد هذه النسبة في السنين القادمة

طيب الآن وش الخطوة الأولى عشان أستفيد من هذه الخدمات؟

بداية، حدد رؤيتك وهدفك بشكل واضح من مشروعك، سواء كان علامة تجارية بالأزياء أو شركة تقدم خدمات مُساندة. جهز سجلك التجاري وأرقامك ووصف مشروعك والهدف من التمويل وكيف بتصرفه والعائد المتوقع، وهذا كله مو شرط تسويه لوحدك، استفيد من الخدمات التطويرية الي يقدمها الصندوق وبيساعدونك بخبرتهم تمشي خطوة بخطوة

وفالكم التوفيق